Həkimlərin yazısı...

Bilirsən, çətin olur
Həkimlərin yazısı...
Onda sənə can verən
Neçə-neçə dərman var!Oxuyub anlamırsan
Bir cümləni, bir sözü,
Amma ona möhtacsan.
Möhtacsan damar-damar!
Mənim sevgim də elə
O yazıya bənzəyir!
Neçə dil topuq vurur,
Neçə söz kəkələyir!
Məni oxuya bilsən
Sənə məlhəm olaram!
Hər dərdini çəkərəm,
Hər qayğına qalaram!
Canına can qataram,
Qollarında yataram...
Sərib ümidlərimi
Ayağının altına,
Gözlərəm gizli-gizli...
Bilirəm bu yazını
Oxumaq da qəlizdi!
Amma oxuya bilsən,
Məndə sənin qəlbinə
Sevgi dolu dərman var!
Sən də mənə möhtacsan,
Möhtacsan damar-damar!